O proxecto, financiado ao 80% pola Deputación, resolve unha demanda dos veciños de Baiona e contempla a creación de zonas de convivencia e sendas peonís nun tramo dun quilómetro desta estrada provincial
O presidente da Deputación de Pontevedra, Luis López, anunciou hoxe en conferencia de prensa a aprobación dun novo convenio co Concello de Baiona, a través do cal se destinarán preto de un millón de euros para mellorar a mobilidade peonil na estrada provincial EP-2203 Baredo-EP Baiona-Loureza. Deste orzamento, a Deputación financiará o 80%, é dicir, 790.000 euros, e o Concello o 20% restante e o importe das expropiacións, que supón un total de 250.000 euros. Trátase dunha demanda que levaba facendo a veciñanza de Baiona e que mellorará o acceso aos distintos barrios de Baredo.
A actuación terá lugar nun tramo próximo ao quilómetro, no que, na zona inicial se executará un área de convivencia entre o tráfico peonil e motorizado e, no resto, executarase unha senda peonil, nos primeiros 100 metros na marxe dereita e, a continuación, na esquerda, ata conectar coa que xa existe na actualidade. Ademais, as obras completaranse con outras actuacións como a renovación do pavimento e das redes de pluviais, o soterramento da rede de alumeado, novas luminarias ou, entre outras, novos pasos de peóns sobreelevados e nova sinalización vertical e horizontal.
Luis López destacou que este é un paso máis na mellora das estradas provinciais, “dando unha maior seguridade viaria aos veciños e veciñas das provincia”, neste caso cun proxecto que contribuirá tamén a reducir as saídas de vía dos coches e os autobuses, principalmente o escolar que vai ao CEIP Fontes-Baíña.
