O Concello de Mos puxo en marcha neste curso escolar unha nova edición do programa educativo “Xadrez na Escola”, dirixido ao alumnado de 1º e 2º de Primaria dos centros públicos do municipio. A iniciativa, incluída na Programación Educativa Municipal 2025/2026, busca achegar o xadrez ás aulas como unha ferramenta pedagóxica de alto valor formativo.
A práctica deste deporte contribúe a potenciar habilidades fundamentais no desenvolvemento do alumnado, como a atención, a memoria, o razoamento lóxico-matemático, a creatividade, a planificación, a toma de decisións e a análise, ademais de promover valores sociais como a empatía, a tolerancia, a deportividade, o respecto e o traballo en equipo. Estudos internacionais avalan o impacto positivo do xadrez no rendemento académico, especialmente en lingua, matemáticas e pensamento crítico.
Os obradoiros son impartidos por Brais Otero, coordinador do Club Xadrez Mos, quen introduce o alumnado nos conceptos básicos do xogo dun xeito lúdico, participativo e adaptado á súa idade. Durante catro sesións, nenos e nenas aprenden o movemento das pezas, as primeiras estratexias, a resolución de situacións de xogo e o valor educativo da disciplina.
Centros participantes
Nesta edición participan os seguintes centros públicos de Mos: CEIP Mestre Valverde Mayo, CEIP Petelos, CEIP Mestre Martínez Alonso, CEIP Atín e CEIP Peña de Francia. A cada curso impártenselle catro sesión da actividade.
O Concello de Mos continúa apostando por programas educativos innovadores que favorezan o desenvolvemento integral da infancia e promovan unha aprendizaxe baseada nos valores e na convivencia.
Esta semana, a alcaldesa Nidia Arévalo visitou o CEIP Mestre Martínez Alonso para coñecer de primeira man o desenvolvemento das sesións e compartir un momento co profesorado e co alumnado participante. “O xadrez é unha ferramenta marabillosa para educar en valores e para adestrar o pensamento; é aprender xogando, e iso sempre é garantía de éxito”, destacou a rexedora.
O Concello de Mos continúa apostando por programas educativos innovadores que favorezan o desenvolvemento integral da infancia e promovan unha aprendizaxe baseada nos valores e na convivencia.
