A alcaldesa, Inés Rey, participou no acto inaugural da exposición “Sempre Marzo”, dentro da programación do Día Internacional da Muller, xunto as poetas Yolanda Castaño, Emma Pedreira e Pilar Pallarés
A alcaldesa, Inés Rey, pechou esta mañá na Fundación Luis Seoane o acto de inauguración da exposición “Sempre Marzo”, enmarcada na programación do 8M do Concello da Coruña, en que as artistas e poetas da Galicia contemporánea toman os papeis a través dunha mostra composta por 12 poemas manuscritos, 33 cadros e unha escultura.
O acto inaugural tamén contou coa presenza da concelleira de Benestar Social, Igualdade e Participación, Yoya Neira, a directora da Fundación Luis Seoane, Silvia Longueira, e as poetas Yolanda Castaño, Emma Pedreira e Pilar Pallarés.
Na súa intervención, a alcaldesa destacou que “a cultura é a maior expresión para defendermos os nosos dereitos como mulleres” e apuntou que, desde o Goberno local, “sempre traballaremos pola igualdade desde todos os ámbitos e apoiaremos á cultura e a vós, as súas creadoras e creadores, porque grazas ao voso traballo, esas Mulleres sen Límites que dan nome á campaña institucional do Concello para conmemorar o 8 de marzo de 2021, vólvense máis reais”.
O proxecto artístico mestura poesía e cadros de autoras e autores galegas/os e da Coruña, unha mirada persoal de artistas galegas sobre a igualdade e o camiño para conseguila.
