Terá lugar o vindeiro mércores pola tarde contando coa presencia do director de La Vuelta, Javier Guillén, e co presidente do RC Celta, Carlos Mouriño; e será retransmitida en directo desde a páxina oficial de Facebook do Concello de Mos
Coincidindo co Día Mundial da Bicicleta que hoxe se celebra, o Concello de Mos reanuda a súa Mesa de La Vuelta con motivo de que o municipio mosense será protagonista de novo (xa que o ano pasado albergou unha saída de etapa desde o Pazo de Mos) da competición ciclista, sendo meta o Castro de Herville, na parroquia de Cela, da etapa 20 de La Vuelta 21, Sanxenxo-Mos, que terá lugar o 4 de setembro. A primeira Mesa de La Vuelta 21 do Concello de Mos tivo lugar ás 19.00 horas desta tarde nos exteriores da Capela da Virxe das Neves de Herville contando coa presencia da alcaldesa de Mos, Nidia Arévalo, o concelleiro de Deportes, José Areal, a concelleira de Cultura e Turismo, Sara Cebreiro, os edís mosenses das parroquias de Cela e Pereiras, Gonzalo Alonso e Leo Costas, respectivamente, representantes do Centro Cultural e Social de Herville e da Comunidade de Montes de Herville, membros da empresa coordinadora das actividades relacionadas con La Vuelta, e representantes do tecido asociativo empresarial, educativo, veciñal, cultural, deportivo, etc. da localidade mosense.
Durante esta sesión constitutiva da Mesa de La Vuelta 21 anunciouse que o vindeiro mércores 21 de abril as 19.00 horas, a Cidade Deportiva do RC Celta, Afouteza, será esceario da presentación oficial da meta en Mos da etapa 20 de La Vuelta 21 do 4 de setembro. Á devandita presentación asistirán o director de La Vuelta, Javier Guillén, xunto con Óscar Pereiro e, por suposto, a rexedora local mosense, Nidia Arévalo; ademáis de contar tamén coa presencia do presidente do RC Celta, Carlos Mouriño, do Vicepresidente Primeiro da Xunta de Galicia, Alfonso Rueda, e da directora da Axencia Turismo de Galicia, Nava Castro, entre outras autoridades. A presentación retransmitirase en directo desde a páxina oficial de Facebook do Concello de Mos. Outros puntos tratados no orde do día da Mesa desta tarde foron a presentación e benvida dos novos integrantes da mesma, a exposición dos datos sobre a etapa 20 con meta en Mos e dos proxectos, iniciativas e actividades conmemorativos do evento deportivo durante os vindeiros meses previos á etapa; e finalizouse coa habitual rolda de rogos e preguntas.
A alcaldesa mosense, Nidia Arévalo, quixo esta tarde “poñer en valor o potencial ciclista desenvolvido no municipio durante os 2 últimos anos, sendo saída e chegada de La Vuelta Ciclista a España, edicións 2020 e 2021, respectivamente; contando ademáis cun Mestre de Cerimonias de honra, o noso ciclista mosense por antonomasia e por excelencia, Óscar Pereiro, único galego gañador dun Tour de Francia”. E aproveitou tamén para destacar que “desde o Concello de Mos lle estamos inmensamente agradecidos a Óscar Pereiro por ser o primeiro e principal valedor do noso pobo, de Mos, nesta hazaña deportiva que volve a situar a Mos no mapa e a convertilo xa, indiscutiblemente, en emblema nacional do ciclismo”. E declarouse “satisfeita e enormemente orgullosa de que La Vuelta volte a elixir a Mos dentro do seu percorrido e ademáis por segundo ano consecutivo. Facendo a Mos protagonista en dúas edicións consecutivas de La Vuelta, saída de etapa o ano pasado e chegada da penúltima etapa este ano”. Arévalo agradécelle enormemente a Pereiro “que apostase por Mos e deseñase unha etapa que demostra o profundo cariño e un gran coñecemento do seu pobo”.
