Oito centros escolares acollen a programación do ‘Conclia Verán’ os meses de xullo e agosto. A Aula da Natureza do río Miño amplía a oferta até o mes de setembro.
O prazo de preinscrición vai do mércores, 16 de xuño, até o domingo 20 de xuño ás 24 h, a través da web: www.educacionourense.es
A Concellería de Educación abre, este mércores 16 de xuño, o prazo para preinscribirse nas actividades do programa Concilia Verán 2021, adaptado ao protocolo da COVID 19, e dirixido a escolares de 4 a 12 anos dos meses de xullo a setembro.
Nos meses de xullo e de agosto, o programa desenvolverase en oito centros escolares [CEIP O Couto, CEIP Manuel Luís Acuña, CEIP Vistahermosa, CEIP Irmáns Villar, CEIP Amadeo Rodríguez Barroso, CEIP As Mercedes, CEIP Prácticas e CEIP A Ponte] e na Aula da Natureza do Río Miño. Esta última estenderá as súas actividades até o inicio do curso escolar (do día 1 ao 9 de setembro de 2021)
As actividades están orientadas á consecución de hábitos de vida saudables, actitudes solidarias e de convivencia, a promover a igualdade de xénero e o respecto ao medio ambiente. Ademais de actividades lúdicas haberá reforzo educativo de matemáticas, lingua e idiomas. A rapazada con necesidades especiais (NEE) recibirá atención personalizada en todos os centros.
Preinscrición
A preinscrición e a matriculación realizaranse de forma telemática. O prazo vai do 16 de xuño ás 9.00 horas até o 20 de xuño, domingo, ás 24 horas, a farase a través da web: www.educacionourense.es. Unha vez admitida a solicitude, o prazo para formalizar a matrícula será do 23 ao 27 de xuño.
Todas as actividades van dirixidas a escolares de 4 a 12 anos (4º de EI, rematado este ano, ata 6º de EP). Terá preferencia a rapazada de pais e nais que estean en activo e empadroada no Concello de Ourense.
Horarios:
Centros escolares, de 8.00 a 14.30 horas.
Aula da Natureza de 10.00 a 13.00 horas e de 17.00 a 19.00 horas de luns a xoves; os venres só de mañá.
Estas actividades de conciliación únense ás do Espazo Coeduca e ás dos Centros Cívicos, organizadas polo Concello de Ourense.
