A xornada comezou ás 10.00 horas coa saída da proba absoluta e continuou coas outras seis carreiras de categorías inferiores
O concelleiro de Deportes, Manuel Vázquez, fíxolle entrega dos premios aos corredores e corredoras vencedores da proba
O circuíto Coruña Corre chegou ao ecuador coa undécima edición da carreira popular dos Rosales, cuarta cita do circuíto. En total, 920 corredores e corredoras chegaron este domingo á liña de meta nas diferentes probas, tanto na categoría absoluta como nas inferiores.
O concelleiro de Deportes, Manuel Vázquez, asistiu á saída da proba, que arrincou ás 10.00 horas coa saída das e dos inscritos da categoría absoluta. Facundo Médard e Paloma Gándara foron os gañadores da proba absoluta, seguidos de Abdelaziz Faithi e Antón Gómez e Rebeca Soto e Marí Isabel González respectivamente.
O percorrido da categoría absoluta, de 6,3 quilómetros, comezou na avenida Fernando Suárez García. En torno ás 12.00 horas saíron, progresivamente, as e os participantes en categorías inferiores sub-18, sub-16, sub-14, sub-12, sub-10 e peques, con percorridos máis curtos en función da franxa de idade (dende 2,4 quilómetros para os maiores e 155 metros na categoría peques).
Os resultados poden consultarse na web do Coruña Corre. O concelleiro de Deportes entregoulle os premios ás e aos deportistas gañadores da xornada destacando a calidade do circuíto Coruña Corre e a aposta do Goberno de Inés Rey pola ampliación das carreiras, chegando a máis barrios co paso da carreira de Matogrande por Xuxán.
A próxima cita do circuíto Coruña Corre, en setembro
Logo da carreira popular dos Rosales, o circuíto Coruña Corre despídese ate o mes de setembro, volvendo á actividade coa VIII edición da carreira de Matogrande. Será o 15 de setembro, coa quinta cita do Coruña Corre que este ano chega por primeira vez ao barrio de Xuxán.
O Concello habilitará proximamente a inscrición na proba, que partirá ás 10.00 horas desde a rúa Sebastián Martínez Risco, á altura do colexio Liceo La Paz. Os diversos percorridos previstos tanto en categoría absoluta como en categorías inferiores poderán consultarse nas vindeiras semanas a través desta ligazón.
