• Alumnos e alumnas do CEIP Manuel Fraga Iribarne coñecerán o traballo do persoal investigador do Centro de Astrobiología (CSIC- INTA) e a súa participación na última misión a Marte.
• O taller desenvolverase de forma virtual para estudantes de segundo de primaria.
· A actividade enmárcase no proxecto de divulgación Ciudad Ciencia, unha iniciativa do CSIC e a FECYT presente en Cariño desde 2020
Os alumnos e alumnas do CEIP Manuel Fraga Iribarne recibirán mañá venres, 26 de marzo, a visita virtual de Juan Anxo Vaquerizo, responsable da Unidade de Cultura Científica no Centro de Astrobiología (CAB), instituto mixto do Consello Superior de Investigacións Científicas (CSIC) e do Instituto Nacional de Técnica Aeroespacial ( INTA). Ás 11:00 horas, estudantes de 2º de Primaria realizarán en formato en liña o taller ‘Buscando vida no universo’, que pretende dar a coñecer a actividade científica que se realiza nas instalacións do CAB e como se investiga a existencia de vida noutros planetas.
Juan Anxo Vaquerizo explicará aos e as estudantes en que consiste a astrobiología e contará algúns detalles da exitosa aterraxe do rover Perseverance en Marte, así como a tecnoloxía española que viaxou a bordo desta misión. Tamén realizará experimentos sinxelos para entender por que non hai auga líquida en Marte.
Dadas as circunstancias sobrevindas pola pandemia, o proxecto Ciudad Ciencia adaptou as súas actividades para seguir realizándoas de forma segura. Desta maneira, os centros educativos como o CEIP Manuel Fraga Iribarne poden acceder ao material audiovisual presente na web www.ciudadciencia.es, realizar os experimentos propostos neste taller e asistir a unha charla virtual co seu protagonista para resolver dúbidas e ampliar os coñecementos que se tratan nestas pílulas audiovisuais de contido científico.
Ciudad Ciencia (www.ciudadciencia.es) é un proxecto de divulgación científica do Consello Superior de Investigacións Científicas (CSIC) e a Fundación Española para a Ciencia e a Tecnoloxía ( FECYT) coa colaboración de concellos de toda España cuxo fin é que a cidadanía coñeza de primeira man a actualidade científica e tecnolóxica.
Ciudad Ciencia desenvólvese desde 2012 en 50 localidades españolas.
Máis información sobre as actividades de Ciudad Ciencia en Cariño en www.ciudadciencia.es.
