O edil de Deportes, Ibán Santalla, presentou hoxe xunto con Anxo Grandal e Víctor Matesanz, vicepresidente e tesoureiro respectivamente do Club Arco Narón, o “III Trofeo de fin de escolas de tiro con arco” que se celebrará este domingo, día 16, no campo de fútbol de San Mateo. A convocatoria reunirá a partir das 9:30 horas e ata o mediodía a máis de medio cento de arqueiros procedentes de nove clubs de toda Galicia.
Os representantes do club local informaron que a maiores dos arqueiros do seu club participarán neste torneo outros dos clubs Arco Ferrol; The Cutarc Team da Coruña; do Cachamuiña de Ourense; de Flechas por un tubo, de Ponteceso; do Seurri de Lugo; do Universitario da Coruña; de Arqueros club de Cambre e do Arco Laracha. “Os arqueiros, de entre 3 e 60 anos, xogarán en once categorías diferentes”, apuntaron dende o Arco Narón, indicando que entre eles estarán algúns campións da selección galega –algúns deles do Arco Narón- e tamén dúas arqueiras con discapacidade, o que consolida a tan necesaria aposta e impulso ao deporte inclusivo.
A competición será unha das dúas que se realizan ao ano ao aire libre en Galicia, segundo apuntaron, e agárdase que acudan numerosas persoas para animar aos participantes.
O edil de Deportes de Narón destacou o traballo do club Arco Narón e a súa aposta por continuar impulsando o deporte, neste caso o tiro con arco, na cidade. Santalla valorou o compromiso do club e tamén recordou que próximamente os arqueiros e arqueiras terán á súa disposición o novo campo de tiro con arco de Río do Pozo, unhas instalacións que supuxeron un desembolso duns 400.000 euros.
