Participarán o xeógrafo da UAB Pau Avellaneda, a arquitecta Izaskun Chinchilla e o arquitecto Mateus Porto, ademáis da técnica provincial Andrea Otero
A ‘Facultade Ágora’ celebra este venres a súa terceira xornada coa visita de novas figuras de grande renome no estudo do espazo público que exercerán de ‘profesores’ das e dos responsables políticos e técnicos dos concellos da provincia. Neste caso participarán o xeógrafo Pau Avellaneda, a arquitecta Izaskun Chinchilla e o arquitecto Mateus Porto, ademais da técnica provincial Andrea Otero, que falarán de como crear “espazos amables, seguros e inclusivos’, tal e como indica o título do seminario, dende unha perspectiva social e tamén feminista.
Concibida como unha ferramenta de formación sobre o espazo público dirixida a representantes políticos e técnicos da provincia para tratar con calidade o espazo público recuperándoo para as persoas. Están inscritas máis de 210 persoas con poder de decisión político e técnico dos municipios e arredor de medio cento de persoas do resto do estado español atraídas pola calidade da oferta formativa e do cadro docente.
Pau Avellaneda García é doutor en Xeografía pola Universidade Autónoma de Barcelona (UAB), está especializado en aspectos de mobilidade sostible e segura. É profesor de Xeografía da UAB, onde imparte Teoría sobre Ordenación do Territorio, Mobilidade e Transporte. Investiga no marco do Grupo de Investigación de Xeografía Económica e do Instituto de Estudos Rexionais e Metropolitanos de Barcelona.
Izaskun Chinchilla estudou Arquitectura na Escola Técnica Superior de Arquitectura da Universidade Politécnica de Madrid. Graduouse en 2001 e obtivo o premio ao mellor expediente académico da súa promoción e cunha matrícula de honra polo seu proxecto de fin de carreira. Desde entón dirixe o seu propio estudio de arquitectura, con sede en Madrid. As súas investigacións abordan aspectos coma a ecoloxía, a socioloxía e os modos de vida contemporáneos, que aplica á súa práctica profesional e académica. É autora do libro ‘A cidade dos coidados’.
Mateus Porto é arquitecto e urbanista pola Universidade de Brasília (2003) e cun diploma en Estudos Avanzados no doutorado Periferias, Sustentabilidade e Vitalidade Urbana da Universidade Politécnica de Madrid (2009). Desenvolve traballos de consultoría e plan urbano relacionado coa mobilidade, especialmente dos medios non motorizados. Colaborou na redacción de diversos plans de mobilidade urbana sostible (PMUS). É coautor dos libros Nuevas formas de acondicionamento litoral (2009) e La ciudad paseable (2010). Desde 2008 é profesor no Departamento de Urbanística e Historia da Arquitectura da Escola Superior de Arte e Arquitectura da Universidade Europea de Madrid.
Na xornada deste venres traballarase sobre como definir as condicións que debe reunir un espazo amable, seguro e inclusivo, contrapoñendo as cidades que coidan fronte ás cidades que expulsan. Repasaranse os aspectos técnicos dun espazo público pensado para as persoas: plataformas únicas, beirarrúas, pasos elevados, iluminación, anchura de carrís, materiais, vexetación…
