A Deputación acaba de adxudicar a campaña por un importe de 255.000 euros para ofrecer a partir de outubro preto de 400 petiscos baseados nos menús das festas gastronómicas de interese turístico da provincia
A Deputación de Pontevedra activará a campaña 100% Gastronomía das Rías Baixas, de promoción das festas gastronómicas de interese turístico da provincia, a partir de comezos de outubro. O presidente Luis López fixo este anuncio este venres en comparecencia de prensa tras dar luz verde á adxudicación desta campaña na Xunta de Goberno provincial por valor de 255.000 euros. “Percorreremos a provincia con tres food trucks que farán tres rutas polo norte, o centro e o sur da provincia, ofrecendo un total de 366 degustacións ao longo de cinco meses en formato de pinchos” baseados nos menús das 25 festas gastronómicas de interese turístico galego, nacional e internacional das Rías Baixas.
100% Gastronomía das Rías Baixas será unha acción de promoción e posta en valor da gastronomía pontevedresa que visitará os 61 concellos da provincia con sesións ininterrompidas de 3 horas de duración ao mediodía (de 12:30 a 15:30 horas) e tarde (de 18:30 a 2130 horas), que se mobilizarán cinco días á semana e sempre os sábados, domingos e días festivos. Cada food truck recalará un día en cada concello, pero poderase aproveitar situacións excepcionais de grande afluencia para quedar ata un máximo de tres días. Nelas, a cidadanía ademais de degustar as elaboracións terá á súa disposición material informativo sobre estas festas.
Luis López lembrou, como informou fai uns días na Estrada, que as Rías Baixas foron en xullo “líderes en Galicia e aumentamos nun 6% o noso turismo estranxeiro”. O presidente da Deputación sinalou que 100% Gastronomía das Rías Baixas encádrase “nun dos puntos da nosa aposta turística, que pasa por ofrecer experiencias desestacionalizadoras, e por iso implementamos esta campaña en temporada baixa”.
