O presidente da Deputación, acompañado polo deputado de Cultura, Jorge Cubela, asistiu a un acto que demostra o arraigo que ten a escultura na provincia de Pontevedra
O presidente da Deputación de Pontevedra, Luis López, participou este sábado nos actos de celebración do Día das Artes Galegas, dedicado este ano ao escultor cambadés Francisco Asorey. A gala, promovida desde o ano 2015 pola Real Academia das Artes Galegas, celebrouse no auditorio municipal de Cambados e contou cunha conferencia sobre a vida, obra e transcendencia deste artista nacido na provincia de Pontevedra a cargo do académico Felipe Senén López Gómez.
Acompañado polo deputado de Cultura, Jorge Cubela, o mandatario provincial estivo nun acto no que o académico explicou a traxectoria dun escultor que naceu nesta vila do Salnés no ano 1889 para converterse nun dos renovadores da arte galega, cunha intensa, singular e monumental obra repartida por toda Galicia, Euskadi, Cataluña, Bos Aires e Montevideo. A súa obra de carácter modernista e que busca os contrastes, mesmo de pedras e madeiras, caracterízase polo simbolismo baseado nas tradicións galegas, as que entendía nesa interrelación céltica de paisaxe e paisanaxe.
Desde a Deputación de Pontevedra poñen en valor a elección de Francisco Asorey para festexar este ano o Días das Artes Galegas. Unha elección que demostra a longa tradición e o arraigo que ten a arte, concretamente a escultura, na provincia de Pontevedra.
