Ana Laura Iglesias denuncia que as monxas do Mosteiro se atoparon coa instalación “completamente desmantelada cando falamos dunha oficina icónica da Rede Info Rías Baixas, que ostenta a Q de calidade e que foi dixitalizada co programa Tourist Inside”
A alcaldesa de Meis cualifica de “intolerable o peche unilateral da Oficina, sen comunicalo ao Concello e deixando ás persoas peregrinas e o turismo completamente desasistido cando chegan á “Catedral do Salnés”
O Grupo Provincial do PSDG-PSOE instou hoxe ao presidente da Deputación de Pontevedra “a dar explicacións urxentes ante o sorprendente peche da Oficina de Turismo do Mosteiro de Armenteira, unha das oficinas máis relevantes da Rede Info Rías Baixas e de xestión directa da propia institución provincial”. A portavoz socialista, Ana Laura Iglesias, que visitou hoxe o Mosteiro acompañada do deputado Javier Mougán e da alcaldesa de Meis, Marta Giráldez, manifestou a súa estupefacción ante o ocorrido no Mosteiro onde as monxas se atoparon este venres coa oficina pechada e completamente desmantelada: “leváronse as mesas, cadeiras, o mostrador e ata as estanterías sen que ninguén dixera porque”.
A deputada sinalou que “resulta indignante que, por enriba, fixeran semellante desfeita con nocturnidade e aleivosía, xa que as monxas fixeron chegar ao goberno de Luís López o seu desexo de renovar o convenio que o Mosteiro ten coa Deputación e nunca tiveron contestación ata agora que atoparon a oficina desmantelada”. Iglesias lamentou tamén o “lamentable procedemento de levarse todo sen informar ás relixiosas, que nos trasladaron a súa preocupación xa que, amais, esta Oficina xestionaba as visitas guiadas ao Mosteiro, e era unha referencia para milleiros de peregrinos e peregrinas que realizan a variante espiritual do Camiño Portugués”.
A alcaldesa de Meis, Marta Giráldez, cualificou de “intolerable a actuación da Deputación que non comunicou nada ao Concello para explicar as razóns deste peche insólito e prescinde dunha oficina no lugar máis emblemático da comarca, con gran movemento, deixando desasistido ao turismo e ás persoas peregrinas que se achegan ao Mosteiro que é á Catedral do Salnés. É incomprensible e reivindicamos a súa reapertura inmediata polo enorme dano que fan á nosa comarca. A alcaldesa mostrou tamén a súa incredulidade polas formas coas que o goberno provincial actuou co desmantelamento “sen avisar a ninguén”.
Ana Laura Iglesias esixiu ao goberno da Deputación que explique de forma inmediata as razóns do ocorrido e unha desculpa pública por como o fixeron”. A portavoz lembrou que a Oficina de Turismo do Mosteiro de Armenteira é unha das tres instalacións icónicas da Deputación, xunto á do Palacete das Mendoza e a do Aeroporto de Peinador. Amais, ostenta a Q de calidade, o distintivo que concede o ICTE, convertendo a Oficina do Mosteiro nunha referencia en atención ás e aos visitantes, cumprimento dos estándares e procedementos certificados. “De feito, engadeu Iglesias, aínda no pasado xaneiro o goberno de Luís López recolleu en Madrid a renovación da Q da oficina de Armenteira que agora desmantela. Todo é lamentable”.
Por outro lado, a instalación estaba completamente transformada e recentemente foi dixitalizada co proxecto europeo Tourist Inside, xestionado polo goberno anterior, que a dotou de todas as novas tecnoloxías para a inclusión e accesibilidade e de información ao turismo.
