Unha axente da Policía Local de Ourense auxiliou un bebé que requiría atención urxente a causa dunha obstrución das vías respiratorias.
O pasado venres, 11 de abril, ás 22.05 horas, cando desenvolvía as súas funcións ordinarias dentro do edificio da Xefatura da Policía Local, un axente advertiu a presenza dun grupo de persoas visiblemente nerviosas, portando unha delas un bebé, que se aproximaban de forma apresurada solicitando auxilio de maneira urxente.
Ante esta situación, o axente abriu a porta de acceso e solicitou por emisora a presenza urxente dunha ambulancia medicalizada. A axente coordinadora do servizo aproximouse ao lugar e observou que o lactante presentaba claros signos de obstrución das vías respiratorias, polo que procedeu a colocalo en posición de seguridade e realizar a manobra de desobstrución, conseguindo que o lactante recuperase a capacidade respiratoria.
Compareceu a ambulancia medicalizada e o bebé foi trasladado ao Complexo Hospitalario de Ourense, co fin de realizar unha observación completa.
