Na súa visita percorreu xunto co alcalde de Valga, José María Bello, e membros da Corporación Local as diferentes estradas provinciais ao seu paso polo termo municipal e coñeceu as prioridades do Goberno local
A deputada de Infraestruturas Públicas, Mobilidade e Contratación, Isabel Couselo, acaba de visitar en Valga xunto co seu alcalde, José María Bello, e membros da Corporación Local, as diferentes estradas provinciais ao seu paso pola vila. Durante a visita, a deputada, que estivo acompañada de técnicos provinciais, tivo a oportunidade de coñecer as prioridades do Goberno Local en canto a estas infraestruturas públicas co obxectivo de marcar unha folla de ruta para impulsar desde a institución provincial nos próximos anos.
Na xuntanza, o Goberno de Valga explicou á deputada provincial Isabel Couselo que entre as súas principais prioridades atópanse o tramo que falta por acondicionar e reparar na contorna da casa da cultura de Valga, na EP-8501 Valga-Martores, así como o proxecto de transformación e humanizacion do tramo da EP- 8502 Valga-Baño que vai desde o centro da vila á zona dos centro educativos.
A visita da deputada de Infraestruturas Públicas ao Concello de Valga enmárcase na serie de encontros que, desde o inicio do mandato, está a manter Isabel Couselo cos diferentes municipios da provincia, para coñecer de primeira man as prioridades dos Gobernos Locais en canto ás estradas provinciais que atravesan os seus diferentes termos municipais.
