A concelleira de Educación acompañounas tamén nesta visita matinal, que se produciu hoxe, e na que preto de 100 escolares de Mos puideron coñecer en profundidade as funcións, funcionamento e competencias da institución, máximo órgano de representación do Pobo Galego
96 alumnos/as de sexto curso de Educación Primaria dos colexios de Mos visitaron esta mañá o Parlamento de Galicia acompañados pola alcaldesa, Nidia Arévalo, a concelleira de Educación, Julia Loureiro, e a tamén edil mosense e deputada autonómica no Parlamento, Feli Rodríguez.
O obxectivo principal desta actividade, promovida e organizada desde o Concello de Mos dentro do programa municipal de actividades en horario lectivo, é que o alumnado de sexto de Primaria coñeza de primeira man o funcionamento do Parlamento de Galicia, que é o máximo órgano de representación do Pobo Galego.
Outros obxectivos desta iniciativa son, tal e como explicaron as representantes municipais Arévalo, Loureiro e Rodríguez Carrera “coñecer as dependencias e funcionamento do Parlamento Galego dunha maneira máis directa. Entender a separación de poderes propia das democracias. E recibir toda a información sobre o funcionamento e competencias da institución”.
Nesta visita participaron os seguintes centros educativos: CEIP Mestre Martínez Alonso con 21 alumnos/as, CEIP Mestre Valverde Mayo con 28 alumnos/as, CEIP Pena de Francia con 22 alumnos/as e CEIP Atín-Cela con 25 alumnos/as.
A visita ás instalacións foi dunha hora de duración aproximada. O alumnado fixo un percorrido polo edificio acompañado dunha guía que lle foi explicando a historia do Parlamento de Galicia e as súas funcións.
A rapazada puido incluso entrar na parte baixa do hemiciclo.
A deputada do Parlamento de Galicia por Mos, Feli Rodríguez, explicoulles aos cativos e cativas asistentes cal é o seu cometido e funcións na cámara.
Outros temas que lles foron explicados aos alumnos e alumnas mosenses durante a visita desta mañá foron: O Parlamento de Galicia no estado das autonomías. O Parlamento de Galicia e os valores da democracia. O Parlamento de Galicia: a sede. Historia do Parlamento de Galicia. Organización do Parlamento de Galicia. Funcións do Parlamento de Galicia. Participación cidadá no Parlamento de Galicia. E datos sobre unha institución comprometida coa cultura.
Tamén abordaron o coñecemento sobre o Mapa Autonómico de Galicia e o Hemiciclo do Parlamento de Galicia.
Deste xeito, os alumnos e alumnas, e os seus profesores e profesoras, puideron coñecer un pouco máis o Parlamento de Galicia e as súas funcións. Tanto os contidos teóricos como as actividades foron totalmente adaptadas ás necesidades do alumnado.
