- Os alcaldes de Soutomaior e Ponte Caldelas visitaron esta mañá a central eléctrica para asinar a acta de recoñecemento necesaria para continuar cos trámites do expediente de extinción
Augas de Galicia continua coa tramitación do expediente de extinción, por finalización do prazo concesional, do aproveitamento hidroeléctrico do rio Verdugo no coñecido Ponche do Inferno. O alcalde de Soutomaior, acompañado do seu homólogo de Ponte Caldelas, Andrés Díaz, e os técnicos de Augas de Galicia e Naturgy, visitou esta mañá a central eléctrica para asinar a acta de recoñecemento do terreo necesaria para avanzar cos trámites de peche.
Segundo o Plan Hidrolóxico de Galicia, o prazo de concesión para a central hidroeléctrica finalizou en marzo de 2017, despois de 131 anos de explotación. Durante este tempo, a presa impedía o tránsito de especies migratorias como a anguía, o salmón e a lamprea.
O alcalde de Soutomaior, Agustín Reguera, cualificou esta visita como “un paso máis para poder recuperar o leito orixinal do Verdugo” e lembrou que Augas de Galicia xa cualificou en 2019 ao río Verdugo como un leito “moi modificado” como medida de protección ambiental incluída na Directiva Marco da auga Europea.
Do mesmo xeito, o edil indicou que a eliminación da presa e a posterior restauración do leito orixinal do rio implicaría a recuperación dun tramo de 2km do rio Verdugo e 5km do rio San Vicente, “o que supoñería un aumento da biodiversidade do río e melloraría a súa produtividade natural. Unha mellora que sería moi beneficiosa para un dos nosos maiores sectores produtivos, o marisqueo”, finalizou Reguera.
Augas de Galicia avanza no peche da prese de Ponte do Inferno
- Anuncio -
