• O Concello leva unha década apostando por este proxecto, que ten como obxectivo axudar a mellorar o grao de autonomía das persoas que padecen algún tipo de discapacidade intelectual
• O alcalde, Manuel Campos, incide na aposta que realiza o Goberno local polas políticas sociais e garante que “seguiremos impulsando actuacións por e para as persoas”
O alcalde de Cuntis, Manuel Campos, participou esta pasada fin de semana no acto de clausura do programa Habilitas Fogar. Trátase dunha iniciativa que a Administración local impulsa, a través dunha achega económica da Deputación de Pontevedra, co obxectivo de potenciar e facilitar a integración a mozos e mozas que padecen algún tipo de discapacidade intelectual. Tal e como lembrou o rexedor, esta é unha proposta única na bisbarra e que xa vai pola súa novena edición. “Levamos unha década apostando por iniciativas, actividades e programas por e para as persoas e así o imos a seguir facendo”, garantiu Campos Velay.
O acto incluíu unha charla informativa que versou sobre apoios autoridixidos. Posteriormente, procedeuse á entrega dos diplomas acreditativos ás persoas que formaron parte do programa nesta última convocatoria. Para finalizar, servíronse uns petiscos. O alcalde cuntiense felicitou persoalmente aos e ás participantes e tamén quixo poñer en valor o traballo e implicación que realiza o persoal municipal, especialmente na área de Servizos Sociais, para facer realidade este proxecto, así como a colaboración dos integrantes de Protección Civil. O obxectivo que se busca co Habilitas Fogar é mellorar o grao de autonomía destas persoas, ao tempo que se potencia o seu autocoidado. A través desta proposta tamén se busca mellorar a súa autoestima e a mellora de habilidades, o que lles permite reducir a súa dependencia de terceiras persoas, tal e como sinala Manuel Campos.
Ademais, no Habilitas Fogar tamén se pon o foco en fomentar o coñecemento da contorna e a utilización de recursos comunitarios. “En definitiva, é unha ferramenta moi importante para axudar ás persoas con discapacidade intelectual no seu día a día”, recalcou o alcalde, que tamén destacou que o Goberno local leva apostando de xeito ininterrompido por esta iniciativa na última década, a excepción da pandemia. O Concello de Cuntis reafirma o seu compromiso á hora de continuar desenvolvendo itinerarios individualizados que sirvan para manter as habilidades do fogar para a vida independente.
Ademais de trasladarlle os seus parabéns polo traballo feito, o alcalde tamén agradeceu ao alumnado do Habilitas Fogar a súa participación no acto do prendido do alumeado de Nadal o pasado xoves.
