O Concello das Neves celebra a finalización das obras de reforma do centro de saúde municipal, unha actuación que mellora a accesibilidade e a calidade das instalacións sanitarias da localidade. Este proxecto, cofinanciado ao 50 % pola Xunta de Galicia e o Concello, contou cun investimento total de máis de 40.000 euros.
O conselleiro de Sanidade, Antonio Gómez Caamaño, acompañado pola directora xeral de Recursos Económicos do Servizo Galego de Saúde, Amparo Pousada, e polo xerente da área sanitaria de Vigo, Javier Puente, supervisou recentemente as obras realizadas, destacando o compromiso institucional que fixo posible este avance.
O Concello das Neves xogou un papel fundamental na contratación e execución destas obras, demostrando unha clara implicación en proxectos que priorizan o benestar da veciñanza e reforzan a sanidade pública local. As melloras acometidas inclúen a modernización das instalacións e a súa adaptación para garantir unha accesibilidade plena, proporcionando un espazo máis cómodo e funcional para pacientes e profesionais.
Ademais, o Concello das Neves xa trasladou á Consellería de Sanidade unha proposta para habilitar unha nova área de pediatría na antiga gardería lindeira co centro de saúde. Tras unha primeira valoración, identificáronse as modificacións necesarias para acondicionar o espazo, que incluiría unha consulta de pediatría e unha sala de espera, coa intención de ampliar os servizos sanitarios dispoñibles para as familias da localidade.
O conselleiro de Sanidade comprometeuse a avaliar esta proposta coa máxima dilixencia, destacando o seu ánimo construtivo para continuar mellorando a atención sanitaria no municipio.
Desde o Concello das Neves agradécese a colaboración institucional da Xunta de Galicia para levar a cabo estas melloras, que reflicten o valor do traballo conxunto entre administracións para atender as necesidades prioritarias da cidadanía.
Con esta reforma, o Concello reafirma o seu compromiso cunha sanidade pública de calidade, accesible e adaptada aos tempos actuais, coa mirada posta no benestar de toda a veciñanza.
