A tiradora viguesa conquista o ansiado ouro nacional para pechar a tempada 2020/2021 en preparación ao Mundial de Outubro en Fort Lauderdale.
Esta fin de semana celebrouse no polideportivo “A Fundi”, en Arganzuela, o campionato de España de Veteranos de Espada. O Club de Esgrima Ciudad de Vigo, representado por Nena Cano, acudiu á cita deportiva máis importante a nivel nacional co obxectivo de conquistar o ouro e posicionarse primeira de clasificación estatal para o próximo mundial de veteranos en Fort Lauderdale (Estados Unidos), que terá lugar en outubro. Despois dun ano de interrupcións continuas tanto en adestramentos como en competicións a nivel galego e nacional, Meniña Cano acudía cunhas boas sensacións e esperando render ao seu máximo nivel, como xa demostrou no Campionato de España Absoluto e coa prata no recente Campionato Galego absoluto 2021.
Na fase de poules obtivo o máximo de vitorias posible, batendo a todas as súas rivais nesta fase inicial do torneo, o que auguraba un bo día. Saía como número uno da devandita fase, tendo que enfrontar en cuartos de final a Nuria Tebar Martínez. A vitoria por 10-9 da viguesa Nena Cano permitiulle avanzar á semifinal onde batería por un claro 7-2 á granadina Isabel Vázquez Corbacho. Na final, enfrontouse á madrileña Cristina De Vargas Hilla; a tiradora galega, cunha formulación táctica moi superior xa desde o principio do asalto (4 – 0), traballou e rendeu ao seu mellor nivel, logrando un resultado final de vitoria por 10 a 3, revalidando o título de campioa de España conseguido noutras tempadas máis amables.
Péchase así unha tempada de ouro para Meniña Cano e o Club de Esgrima Ciudad de Vigo, sempre coa mirada posta nos retos que virán, como é o Mundial de Veteranos en Fort Lauderdale en outubro, así como o Gran Nacional Colombiano, onde a outra punta de lanza do club Daniel Pinto, Campión Galego de Florete 2021, buscará facerse co ouro e posicionarse como o mellor tirador dese país.
