- O prazo de inscrición finaliza o 6 de agosto
- O Concello de Soutomaior acaba de abrir o prazo de inscrición para os interesados en gozar dunha visita única á illa de San Simón. Unha saída conducida por un guía oficial e dinamizada polos monitores do Campo de Voluntariado Illa de San Simón, impulsado pola Xunta de Galicia. A actividade será o mércores 11 de agosto e os interesados en participar deberán inscribirse na Caseta de Turismo instalada no Peirao de Arcade antes do día 6.
A visita ofrece un percorrido guiado a través dos diferentes episodios históricos da illa e os principais personaxes das súas historias como o pirata Francis Drake, Mendiño e os Monxes Templarios. Ademais, o percorrido inclúe en cada historia os conxuntos históricos e naturais da illa, explicando así a súa orixe dunha forma divertida e educativa.
A edil de Turismo, Cristina González, animou a todos os interesados en participar a inscribirse conto antes e “aproveitar a oportunidade para coñecer, dunha forma diferente e divertida, os segredos da illa de San Simón”.
A iniciativa inclúe o transporte en autobús e barco, polo que conta cun número limitado de prazas. O custo é de 5 euros para os participantes empadroados no municipio e de 8 para o resto. O punto de encontro e saída da actividade será o Peirao de Arcade.
O concello de Soutomaior organiza unha visita guiada e teatralizada á Illa de San Simón
- Anuncio -
