A Agrupación Municipal celebrará a súa tradicional comida anual o 10 de maio, na que recoñecerá a traxectoria de Suso Paz
O Alcalde Alberto Varela puxo en valor “o seu arraigo vilagarcián e o seu destacado percorrido institucional” e o secretario xeral local Julio Torrado destacou a súa “visión sensata sobre Vilagarcía e a situación política global”
A Comisión Executiva Municipal do PSdeG de Vilagarcía ven de anunciar que o Militante de Honra de 2025 da Agrupación será Jesús Paz Arias. O nomeamento, que se realiza anualmente e que será conmemorado na comida anual da Agrupación deste 10 de maio, ten como base destacar “a traxectoria política e vital de Suso Paz, comprometido dende as súas etapas máis novas e que sempre estivo indiscutiblemente identificada co progresismo e a socialdemocracia”.
O secretario xeral local Julio Torrado destacou que “é unha honra contar sempre con compañeiros con Suso Paz, que aportan e constrúen sociedade con aportacións sensatas e analíticas, e cunha moi intelixente combinación da visión local de Vilagarcía dentro dunha percepción global da situación política”. O Alcalde de Vilagarcía, Alberto Varela, quixo destacar de Paz Arias que “Suso representa perfectamente a posición ideolóxica solvente de quen ten arraigado o seu compromiso e, co tempo, foino desenvolvendo en escenarios institucionais tan relevantes como o Concello de Vilagarcía e as institucións portuarias de Vilagarcía e Vigo”.
Suso Paz Arias, licenciado en CC Políticas e Socioloxía na Universidade Complutense de Madrid iniciou a súa vinculación co eido político fundamentalmente na súa etapa
universitaria na capital de España, dende a que se comprometeu cunha visión progresista da sociedade. Posteriormente, no seu tránsito á vida laboral concretouno coa súa afiliación ao Partido Socialista no ano 1987. Dende entón, Suso Paz foi concelleiro de goberno en Vilagarcía tendo enorme protagonismo durante a alcaldía de Javier Gago a partir do ano 2003, pero en 2005 a súa experiencia laboral e formación específica no eido portuario levárono a ser nomeado Presidente da Autoridade Portuaria de Vilagarcía e, en 2007, a cambiar o porto de Vilagarcía polo de Vigo onde asumiu tamén a Presidencia.
A Agrupación Municipal quixo destacar, tamén, o arraigo que Suso Paz mantén na sociedade de Vilagarcía “que o identifica cunha visión global de cidade”, como trasladou Torrado.
O nomeamento formal de Paz Arias producirase o vindeiro sábado 10 de maio, na celebración anual da comida da Agrupación, que dende o PSdeG abren á participación de calquera persoa que queira compartir unha xornada de homenaxe a Suso Paz, e para a que apenas corresponderá contactar coa agrupación socialista municipal ou con calquera dos seus representantes locais.
