Hoxe celebrouse unha reunión no Concello de Pazos de Borbén coa asistencia do xerente da área sanitaria de Vigo Francisco Javier e os alcaldes de Pazos de Borbén e Fornelos de Montes, para abordar a falta de pediatras e médicos en ambos municipios. A reunión contou coa presenza do alcalde de Pazos de Borbén, Luciano Otero, a concelleira Victoria Couñago, o alcalde de Fornelos de Montes, Emiliano Lage, e o tenente de alcalde Serafín Martínez.
Pazos de Borbén
O xerente da área sanitaria de Vigo informou que a praza da pediatra en Pazos de Borbén esta garantida, e non só iso senón que está estudando o poñer unha enfermeira pediátrica de reforzo, e mentres a titular da praza non cubre o servizo, asegurou que un día a semana haberá un pediatra para atender o nenos e nenas e implementarase o servizo de pediatría en Redondela, dispoñible a xornada completa, para atender aos nenos de Pazos de Borbén na ausencia da pediatra local. Mantense o compromiso de mellorar a atención pediátrica no municipio. O xerente é coñecedor da sobrecarga de traballo da doutora de Pazos de Borbén e propuxo varias medidas concretas para aliviar a carga burocrática.
Fornelos de Montes
O alcalde de Fornelos de Montes, Emiliano Lage, foi informado de que, a partir deste venres, o municipio contará cun novo médico para atender aos veciños e veciñas. Ademais, asegurouse que haberá unha pediatra dispoñible un día á semana en Fornelos de Montes e garantindo unha atención axeitada aos nenos/as do municipio coa ampliación da pediatría en Redondela, dispoñible a xornada completa. O xerente tamén afirmou que máis de 20 novos facultativos de medicina familiar están rematando os seus estudos e incorporaranse de inmediato, o que permitirá cubrir as necesidades de municipios como o de Fornelos de Montes.
Compromisos Compartidos
Nunha reunión caracterizada por un ambiente cordial, o xerente da área sanitaria de Vigo comprometeuse a resolver os problemas de falta de persoal sanitario en ambos municipios. Ademais da implementación de novos servizos e persoal, asegurou que durante o verán cubriranse as prazas necesarias para garantir unha atención médica axeitada. Enfatizouse que a atención pediátrica e médica non se verá afectada e que as solucións propostas se implementarán con prontitude para beneficio de todos os residentes. O alcalde Luciano Otero e a concelleira Victoria Couñago, xunto co alcalde Emiliano Lage e o tenente de alcalde Serafín Martínez, expresaron o seu agradecemento polo compromiso da área sanitaria e a súa disposición para traballar conxuntamente na mellora dos servizos sanitarios nos seus municipios.
