O presidente do PP de Pontevedra, Rafa Domínguez, acompañado por Pablo Fernández, reuniuse con representantes do Colexio de Enxeñeiros Industriais de Pontevedra para coñecer as necesidades do colectivo
Entre os temas tratados, dous centraron o encontro: o atraso na concesión de licenzas municipais e a falta de chan industrial. “Son as consecuencias de non ter un PXOM actualizado e axustado ás demandas da actualidade”
Para Domínguez e o seu equipo a necesidade dun novo Plan Xeral é “cada día aínda máis evidente”: “É unha esixencia dos colexios profesionais da cidade. Foi e segue sendo unha das nosas principais liñas de traballo”
O presidente do Partido Popular de Pontevedra, Rafa Domínguez, acompañado do seu compañeiro Pablo Fernández, reuniuse con representantes do Colexio de Enxeñeiros Industriais da cidade do Lérez para abordar, entre outros temas, a necesidade que ten a localidade de ter un novo e actualizado Plan Xeral de Ordenación Urbana. Este encontro encádrase nunha serie de entrevistas que os populares están a ter cos colexios profesionais da cidade para así coñecer de primeira man as “demandas e inquietudes destes colectivos”.
Dous foron os temas que vertebraron a reunión: o atraso na concesión de licenzas municipais e a falta de chan industrial e empresarial en Pontevedra. Ambas son demandas coñecidas polos populares e que, para os presentes, poderíanse liquidar coa tramitación dunha novo PXOM para a cidade. “É fundamental actualizar un documento de 1989, que contempla as necesidades daquel entón e está totalmente desfasado. Necesitamos unha norma clara, que facilite os trámites da cidadanía coa Administración local, que sitúe á cidade á cabeza en Galicia en atracción de empresas”, destacou Domínguez.
Sobre este último punto, a atracción de empresas, boa parte da reunión #falar sobre a capacidade do PXOM para crear chan industrial e empresarial, o que axudaría “a traballar nunha contorna segura para que as empresas elixan Pontevedra para instalarse”. Para Domínguez, “nunha cidade onde o Concello celebra o botar a empresas e deixar a miles de persoas en paro, faise fundamental a creación dunha contorna xurídica segura para atraer empresas”.
“O Concello, e é unha demanda compartida co Colexio de Arquitectos e o de Enxeñeiros Industriais, debe sacar do caixón a tramitación do PXOM”, aclarou Domínguez, que avanzou que este é o segundo de “numerosos encontros” para profundar nos detalles e as posturas de todos os afectados por “ter un Plan Xeral caducado”.
