Portos de Galicia aprobou a exención de taxas ao Concello de Poio pola ocupación do edificio e as instalacións da escola de remo de Combarro, situado en dominio público portuario. Dita concesión foi outorgada ao Concello o pasado 5 de novembro cunha vixencia de dez anos con posibilidade de prórroga doutros 5.
A solicitude do Concello, Portos de Galicia resolveu aprobar a exención en aplicación do artigo 40 da Lei de Taxas de Portos de Galicia que permite a bonificación do 100% das taxas por ocupación de dominio público ás corporacións locais cando desenvolvan actividades encadradas entre as finalidades públicas, neste caso a actividade formativa. Por este motivo, o Concello non terá que abonar importe algún polo uso dos máis de 600 metros de edificación en espazo portuario.
A normativa de taxas portuarias contempla estas bonificacións no marco da colaboración institucional entre administracións para facilitar o desenvolvemento de accións que redundan no beneficio do conxunto da cidadanía das vilas portuarias.
